
遍知贝玛嘎波大师教言集PK170བླ་མེད་ལུགས་ཀྱི་རབ་གནས་ཀྱི་ཆོ་ག་ཡན་ལག་བཞི་པ་བཞུགས་སོ།།
16-717
༄༅། །བླ་མེད་ལུགས་ཀྱི་རབ་གནས་ཀྱི་ཆོ་ག་ཡན་ལག་བཞི་པ་བཞུགས་སོ།།
༄། །རབ་ཏུ་གནས་པ།
༄༅། །བླ་མེད་ལུགས་ཀྱི་རབ་གནས་ཀྱི་ཆོ་ག་ཡན་ལག་བཞི་པ་བཞུགས་སོ། ། ༄༅། །སྐད་ཅིག་སྐད་ཅིག་ལ་ནི་སྐུ་གཅིག་ཀ །གྲངས་མེད་རིགས་ཀྱི་རྣམ་འཛིན་གསུང་ཐུགས་ཡང་། །དཔྱད་ཅིང་དཔྱད་ཅིང་
རྟག་བརྟན་གཡུ་དྲུང་ལས། །གཡོ་མིན་ཁྱོད་ཀྱིས་བདག་ཅག་རབ་གནས་མཛོད། །བླ་མེད་རྒྱུད་ལུང་དཔང་ཐུབ་བཤད་བསྲོལ་བསྟེན། །འཇུག་བདེ་མན་ངག་སྦྱོར་བ་ལེགས་པས་ན། །ཡན་ལག་བཞི་ལྡན་ལྷ་དབང་བསྐུར་ཆེད་
དུ། །ཆས་ཞོར་མཐའ་གཅིག་འཛིན་པའི་ཞེན་ཡུལ་ཕྲོགས། ། སྤྱིར་རབ་ཏུ་གནས་པ་ཞེས་བྱ་བ་ནི་འཕགས་པ་ཉན་ཐོས་ཀྱི་ལུགས་ལའང་འཐད་པ་སྟེ། ཆོས་རྒྱལ་མྱ་ངན་མེད་ཀྱིས་རྒྱལ་བའི་རིང་བསྲེལ་གྱི་
སྙིང་པོ་ཅན་གྱི་མཆོད་རྟེན་བྱེ་བ་ཕྲག་བརྒྱད་ཁྲི་བཞི་སྟོང་བཞེངས་པ་གནས་བརྟན་ཆེན་པོ་གྲགས་པས་རབ་ཏུ་གནས་པར་མཛད་ཅེས་གྲགས་པས་སོ། །བྱེ་བྲག་ཐེག་ཆེན་གྱི་མདོ་ལུགས་ཇོ་བོ་ཆེན་
པོ་ཨ་ཏི་ཤའི་ཕྱག་བཞེས་འབྲོམ་རྒྱལ་བའི་འབྱུང་གནས་ཀྱི་རྗེས་སུ་འབྲངས་པ་དང་། སུ་མ་ཏི་ཀཱིརྟིས་མཛད་པ་སོགས་དང་། བྱ་སྤྱོད་ལ་རབ་ཏུ་གནས་པའི་རྒྱུད་ལ་སོགས་པ་དང་། རྣལ་འབྱོར་གྱི་
རྒྱུད་ལ་ལོ་ཙ་བ་རིན་ཆེན་བཟང་པོས་སྡོམས་མཛད། དེ་ལྟར་གཏན་ལ་ཕབ་པ་རྗེ་བཙུན་གྲགས་པ་དང་། བུ་སྟོན་གྱིས་དུས་འཁོར་ལ་དེའི་རྗེས་སུ་འབྲངས་པ་དང་། བདག་གི་རྗེ་བླ་མས་བདེ་མཆོག་འཁོར་ལོའི་རབ་གནས་དེའི་འགྲོས་སུ་བཤད་པས་རྒྱས་པར་འདོད་པ་དག་ནི་དེས་མགུ་བར་འགྱུར་རོ། །
16-718
འདིར་སྡོམ་པ་འབྱུང་བའི་ལུང་དེ་དང་མཐུན་པར་དཔལ་མཻ་ཏྲི་པ་དང་། ཨ་བྷ་ཡས། རྡོ་རྗེ་འཕྲེང་བར་བཤད་པའི་སྲོལ་ལ་ཞུགས། ཆོ་ག་འབྲིང་དུ་བསྟན་པས་འཇུག་པ་བདེ་བའི་ཕྱིར་མན་ངག །
དེ་ཡང་ཚིག་གི་སྦྱོར་བ་ཕུན་སུམ་ཚོགས་པས་ཡན་ལག་བཞི་དང་ལྡན་པར་བཤད་དོ། །དེ་ནས་གཞན་ཡང་རབ་གནས་ཀྱི། །ཆོ་ག་ཕ་རོལ་སོན་བཤད་བྱ། །དེ་ལ་རབ་ཏུ་གནས་བྱེད་ཀྱི་སློབ་
དཔོན། སྔར་བཤད་མཚན་ཉིད་དང་ལྡན་པ། །སློབ་དཔོན་དུ་ནི་ཡོངས་སུ་བརྟག །ཅེས་པའི་སྔར་བཤད་པ་ནི་ལེའུ་བཅུ་བདུན་པར། བརྟན་ཞིང་ཟབ་མོའི་ཆོས་ཤེས་པ། །རབ་གནས་གཏོར་མའི་ཕ་རོལ་སོན། །སྦྱིན་
སྲེག་དཀྱིལ་འཁོར་དེ་ཉིད་ཤེས། །རིག་པའི་གནས་ནི་ཐམས་ཅད་རིག་ཅེས་པས་སོ། །གང་རབ་ཏུ་གནས་ན། ལུགས་མའམ་མངོན་པར་འདུས་བྱས་པའི། །སྐུ་གཟུགས་ལ་སོགས་པ་རྣམས་ནི། །སོགས་སྒྲས་གཙུག་ལག་ཁང་
དང་ཁང་བཟང་དང་། པོ་ཏི། མཆོད་རྟེན་རྣམས་སོ།། །།
༄། །ཇི་ལྟར་བྱ་བའི་ཆོ་ག་ལ། ས་ཆོག་དང་། སྟ་གོན།
ཇི་ལྟར་བྱ་བའི་ཆོ་ག་ལ། ས་ཆོག །སྟ་གོན། དངོས་གཞི་ལྷ་དབང་བསྐུར་བ་གསུམ་ལས་དང་པོ་ནི། རབ་གནས་དོན་དུ་ས་སྦྱང་ཞིང་། །བླ་
བྲེ་རྒྱལ་མཚན་བ་དན་རྣམས། །བརྒྱན་ཞིང་ས་ནི་ཡོངས་སུ་གཟུང་། །ཞེས་ཀྱིལ་འཁོར་གང་གིས་རབ་ཏུ་གནས་པ་དེའི་གཞུང་བཞིན་དུ་བྱའོ། ། གཉིས་པ་ནི། བདག་བསྐྱེད་ལྷ་དང་བུམ་པ་ལྷག་གནས་བྱས་ནས་རྟེན་སྟ་གོན་ལ་དང་པོར་སྦྱང་བ། 
16-719
སྐུ་གཟུགས་སམ་ནི་གླེགས་བམ་མམ་བྲིས་སྐུ་ཡོངས་སུ་རྫོགས་པ་རྣམས། །མདུན་རོལ་དུ་ནི་བཞག་པར་བྱ། །བསྐྱོད་པར་ནུས་པ་ནི་དེ་ལྟར་བྱ་ལ། དེ་ལ་ཁྲུས་ཀྱི་དཀྱིལ་འཁོར་ཡང་བྱའོ། །གཞན་མི་
ནུས་པ་ཁང་བཟང་ངམ་མཆོད་རྟེན་སོགས་ལ་རང་ཉིད་དེའི་མདུན་ངོས་དེ་ལ་ཁ་ཕྱོགས་པ་སྟེ། འདི་ལ་ཁྲུས་དཀྱིལ་མི་དགོས་སོ། །རང་ལྷའི་ང་རྒྱལ་གྱིས་རྟེན་དེ་ལ་ཕྱོགས་པས་བགེགས་ལ་གཏོར་
མ་སྦྱིན་བཀའ་བསྒོས་ཏེ། ཞལ་བཞི་པའི་སྔགས་ཀྱིས་བསྐྲད་དོ། །དེ་ནས་ཨོཾ་ཨཱཿབྷི་གྷ་ནཱནྟ་ཀྲྀ་ཏ་ཧཱུཾ། བཟླས་པ་དང་ཡི་གེ་ཧཱུཾ་ལན་བདུན་བཟླས་པའི་ཡུངས་ཀར་གཡས་དང་གཡོན་པའི་ཁུ་ཚུར་གྱིས་
བཟུང་ནས་སོ་སོར་ལན་གཉིས་གཡོན་དུ་བསྐོར་ནས། ཨོཾ་སརྦ་པཱ་པཾ་ད་ཧ་ན་བཛྲ་ཡ་བཛྲ་སཏྭ་སྱ་སརྦ་པཱ་པཾ་ད་ཧ་ན་སྭཱ་ཧཱ། ཞེས་བཟླས་ནས་སྦྱང་བར་བྱ་ཞིང་ཡུངས་ཀར་མེར་
དོར་བས་རྟེན་དེའི་བགེགས་བསྲེགས་པར་བསམ། དེ་བཞིན་དུ་གཡས་སུ་བསྐོར། དེ་བཞིན་དུ་གཡོན་གཡས་སུ་ཆུས་ཀྱང་ངོ་། །ནིར་མཉྩན་སྟེ་བྱུར་རཾ་མི་ཤིས་པ་བསལ་བ་ནི། ཁཾ་ཕོར་དཀར་པོ་དང་། དཱུརྦའི་
སྙིང་པོ་དང་བཅས་པའི་བ་ལྕིའི་ཆངས་བུ་དང་། ཟན་ཆངས་དང་སེང་རས་རྣམས་ཀྱིས་བྱ་བ་སྟེ་སྔགས་སྔ་མས་སོ། །དེ་དག་མེར་མི་སྲེག་པར་ཕྱིར་དོར། ལག་པས་སྐུ་གཟུགས་ལ་ཉེ་རེག་བྱ། 
16-720
འཁོར་ལོའི་གཙོ་བོའི་སྔགས་ཀྱིས་ཇི་ལྟར་རིགས་པར་སྐུ་གཟུགས་ལ་སོགས་པ་དངོས་སུ་འམ་མེ་ལོང་གི་གཟུགས་བརྙན་ལ་དེའི་ཐུགས་ཀར་དྲི་བྱུགས། མེ་ཏོག་གི་འཕྲེང་བ་དབུ་ལ་བཅིངས། མདུན་དུ་མཆོད་
ཡོན་ཕུལ། མར་མེས་ཡོངས་སུ་བསྐོར་ནས་སྔར་གྱི་འཁྱིལ་བའི་སྔགས་དང་། ཡི་གེ་ཧཱུཾ་བཟླས་པའི་མར་དང་བཅས་པའི་སྤོས་དཀར་གྱིས་བདུག་པར་བྱའོ། །སྦྱང་བའོ། །དེ་ནས་ཁྲུས་ནི། དཀྱིལ་འཁོར་གྱི་བྱང་ཕྱོགས་
སུ་ཁྲུས་ཀྱི་དཀྱིལ་འཁོར། གཞལ་མེད་ཁང་པ་ཡིད་དུ་འོང་བ་ཤེལ་གྱིས་གཞི་ལ་རིན་པོ་ཆེའི་ཀ་བས་བརྒྱན་པ། མུ་ཏིག་དང་རིན་པོ་ཆེ་སྣ་ཚོགས་པས་སྤྲས་པ་རྟེན་སྤྱན་དྲངས། དངོས་སུ་
བཀྲུར་མི་བཏུབ་པ་མེ་ལོང་དུ་འཆར། འདག་ཆལ་གྱིས་བྱུག་ཅིང་། རྒྱལ་བའི་སྐུ་ལ་ཉེས་པ་མི་མངའ་ཡང་། །སེམས་ཅན་སྒོ་གསུམ་དྲིམ་སྦྱང་སླད་དུ། །ཆུ་གཙང་འདག་ཆལ་སྨན་སྤོས་ཁྲུས་བགྱིས་པས། །སེམས་
ཅན་སྒོ་གསུམ་དྲི་མ་དག་གྱུར་ཅིག །ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ན་ཡེ་སྭཱཧཱ། ཝཱ་ཀ་བི་ཤོདྷ་ན་ཡེ་སྭཱཧཱ། ཙིཏྟ་བི་ཤོ་དྷ་ནཡེ་སྭཱ་ཧཱ། ཨོཾ་མ་ལ་སཾ་
ཤོ་དྷ་ན་ཡེ་སྭཱ་ཧཱ། རང་གི་སྙིང་ག་ནས་འཕྲོས་པའི་འོད་ཟེར་གྱིས་དེ་བཞིན་གཤེགས་པ་དང་ལྷ་མོ་རྣམས་སྤྱན་དྲངས། དེ་རྣམས་ཀྱིས་བུམ་པའི་ཆུས་ཁྲུས་མཛད། །བཀྲ་ཤིས་ཀྱི་གླུ་དང་སྣ་ཚོགས་པའི་རོལ་མོའི་སྒྲ་ལ་སོགས་པས་མཆོད་པར་གྱུར། 
16-721
རྣམ་རྒྱལ་ལ་སོགས་པའི་ཆུས་བསྡུས་པས་སམ། རེ་རེས། ཁམས་གསུམ་ཀུན་གྱིས་ཕྱག་བྱས་པ། །གསང་བ་གསུམ་གྱི་གནས་ལས་བྱུང་། །དབང་བསྐུར་བ་ནི་རྡོ་རྗེ་ཆེ། །མི་ལྡོག་པ་ཡི་ཁྲུས་གསོལ་ལོ། །ཨོཾ་
སརྦ་ཏ་ཐཱ་ག་ཏ་ཨ་བྷི་ཥིཉྩ་ཧཱུཾ། ཇི་ལྟར་བལྟམས་པ་ནས། ཤྲི་ཡེ་ཧཱུཾ། གཟུགས་ཀྱི་ཕུང་པོ་རྣམ་དག་ཅིང་། །ཉོན་མོངས་གཏི་མུག་སྦྱོང་བྱེད་པ། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །དཔལ་ལྡན་
སྐུ་ཡི་ཁྲུས་གསོལ་ལོ། །ཚོར་བའི་ཕུང་པོ་རྣམ་དག་ཅིང་། །ཉོན་མོངས་ང་རྒྱལ་མཉམ་པ་ཉིད་ཀྱི་ཡོན་ཏན་འདུ་ཤེས་ཕུང་པོ་རྣམ་དག་ཅིང་། །འདོད་ཆགས་སོ་སོར་རྟོག་པའི་གསུང་གི་འདུ་བྱེད་ཕུང་
པོ་ ཕྲག་དོག་ བྱ་བ་ནན་ཏན་ འཕྲིན་ལས་རྣམ་ཤེས་ཕུང་པོ་ཞེ་སྡང་མེ་ལོང་ལྟ་བུའི་ཐུགས་ཀྱི་ ཇི་ལྟར་དམ་པ་ཏོག་དཀར་དགའ་ལྡན་ནས། །ལྷ་མཛེས་ལྷུམས་ནས་བལྟམས་ཏེ་ཁྲུས་གསོལ་ལྟར། །སྐུ་
གདུང་རིང་བསྲེལ་དྲི་མ་མེད་པར་བཅས། །སྤྲུལ་སྐུ་ཡིད་འོང་རྣམས་ལ་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་སུ་པྲ་ཏི་ཤུ་དྡྷེ་སྭཱ་ཧཱ། དེ་ནས་གོས་གཙང་མས། དེ་དག་སྐུ་ལ་མཚུངས་
པ་མེད་པའི་གོས། །གཙང་ལ་དྲི་བ་བསྒོས་པས་སྐུ་ཕྱིའོ། །ༀ་ཧཱུཾ་ཏྲཱཾ་ཧྲཱིཿཨ། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ན་ཡེ་སྭཱ་ཧཱ། ཞེས་བརྗོད་ཕྱི། སྔ་མའི་སར་ན་བཟའ་བཟང་པོ་གཡོགས་ཏེ་བཞག །
16-722
དཀྱིལ་འཁོར་འཁོར་ལོ་ཞེས་པས་རང་གཞུང་གི་དམ་ཚིག་གི་འཁོར་ལོ་བསྐྱེད། བྱིན་བརླབ་བྱས། ནམ་མཁར་གནས། རང་གི་སྙིང་ག་ནས་སྤྲོས་པའི་འོད་ཟེར་གྱིས་རབ་ཏུ་གནས་པར་བྱ་བའི་ཡེ་ཤེས་སེམས་
དཔའ་དང་། སངས་རྒྱས་དང་བྱང་ཆུབ་སེམས་དཔའ་ལ་སོགས་པ་ལྷ་རྣམས་མདུན་གྱི་ནམཁར་སྤྱན་དྲངས། ཕྱི་འབྲང་གི་བགེགས་བསྐྲད་ནམ་མཁར་གནས་པ་ལ། ཉེར་མཆོད་ལྔ་ཡི་ཡང་དག་མཆོད། །ས་མ་ཡ་སྟཾ།
ས་མ་ཡ་ཧོཿ ལན་གསུམ་བརྗོད་པས་གཉིས་མེད་དུ་བསྲེས། དེ་ལ་ཆུ་གསུམ་སྔོན་དུ་འགྲོ་བའི་ཕྱི་ནང་གསང་བའི་མཆོད་པ་ཕུལ། དེ་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ལག་
པ་གཡོན་པས་དྲིལ་བུ་གསིལ། གཡས་པས་སྤོས་འཐུལ། ལྕེ་ཧཱུཾ་ལས་རྡོ་རྗེར་བྱས་ནས། དག་པའི་རྡོ་རྗེ་བཅོམ་ལྡན་འདས། །རིག་པའི་རྒྱལ་པོ་ཕྱག་འཚལ་བསྟོད། །རྡོ་རྗེ་འཆང་ཆེན་བདག་གིས་ནི། །ཇི་ལྟར་
ནུས་པའི་ངེས་སྤྱོད་ཀྱིས། །རིག་པའི་རྒྱལ་པོ་འདི་ཞེས་པ། །སང་ནི་རབ་གནས་བགྱི་བར་འཚལ། །སློབ་མ་རྣམས་ལ་བརྩེ་ཕྱིར་དང་། ། ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་འདས་ཀྱི་གུས་བདག་ལ། །
རྗེས་སུ་གནང་བ་མཛད་པར་རིགས། །སངས་རྒྱས་རྣམས་ནི་དགོངས་སུ་གསོལ། །བྱང་ཆུབ་སེམས་དཔའ་དགྲ་བཅོམ་དང་། །གང་ཡང་གསང་སྔགས་ལྷ་རྣམས་དང་། །འཇིག་རྟེན་སྐྱོང་བའི་ལྷ་ཚོགས་ནི། །རྫོགས་སངས་རྒྱས་ཀྱི་བསྟན་པ་ལ། །
16-723
དགའ་དང་རྡོ་རྗེའི་སྤྱན་མངའ་བ། །བདག་དང་སློབ་མར་བཅས་པ་ལ། །ཐུགས་བརྩེས་ཉེ་བར་བཟུང་ནས་སུ། །ཐུགས་རྗེ་ལྡན་རྣམས་རབ་གནས་མཛོད། །ཅེས་སྙན་གསན་ཕབ། ཨོྃ་བཛྲ་པུ་ནི་རཱ་ག་མ་ནཱ་
ཡ་མུཿ ཞེས་པས་ཡེ་ཤེས་པ་དེ་ནས་གཤེགས་ཏེ་སྟེང་གི་ནམ་མཁར་བྱོན་པར་གྱུར། དམ་ཚིག་པ་དེ་ལ་ཧཱུཾ་བྷྲཱུཾ་ཤྲཱིཾ་ཞེས་བརྗོད་ནས། གོས་ཀྱིས་གཏུམས་ལ་བཞག་གོ །རྟེན་སྟ་གོན་ནོ།། །།
༄། །དངོས་གཞི་ལྷ་དབང་བསྐུར་བ་ལ། །སྔོན་དུ་འགྲོ་བ།
གསུམ་
པ་ལྷ་དབང་བསྐུར་བ་ལ། །སྔོན་དུ་འགྲོ་བ། དངོས་གཞི། རྗེས་ཀྱི་བྱ་བ་གསུམ། དང་པོ་སྦྱང་ཁྲུས་ཏེ། ཡུངས་ཀར་གྱིས་ནི་བསྐོར་ནས་སུ། །ལན་གསུམ་དུའི་ནི་སྦྱང་བར་བྱ། །སྔར་བཞིན་བགེགས་དང་
མི་ཤིས་པ་སྦྱང་། རྐང་མཐིལ་གཉིས་སུ་ཡཾ་ལས་རླུང་གི་དཀྱིལ་འཁོར། ལྟེ་བར་གཏུམ་མོ་ཡེ་ཤེས་ཀྱི་མེ། སྙིང་གར་སྡིག་པའི་ས་བོན་པཾ་ནག་པོ་ལ་ལུས་ངག་ཡིད་ཀྱི་སྡིག་སྒྲིབ་ཐམས་ཅད་
འདུས་ཏེ་ཡོད་པ། རླུང་གཡོས་ལྟེ་བའི་གཏུམ་མོ་ཡེ་ཤེས་ཀྱི་མེ་འབར་བས་སྙིང་གའི་པཾ་དེ་ཉིད་སྡིག་པ་ར་ཅན་གྱི་རྣམ་པར་སྣ་སྒོ་ནས་ཐོན་མདུན་གྱི་ཏིལ་ལ་ཐིམ་པར་གྱུར། མདུན་
དུ་མེ་དང་ཆུ་བསངས། མེ་ནང་དུ་ཁྲོ་བོ་ཟ་བྱེད་རྡོ་རྗེ་མཁའ་འགྲོ་རྡོ་རྗེ་དང་དྲིལ་བུ་འཛིན་པ་ཞལ་ཤིན་ཏུ་གདངས་པར་ཕུལ། ཨོཾ་བཛྲ་ཌཱ་ཀ་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ད་ཧ་ན་བྷ་སྨིན་ཀུ་རུ་སྭཱ་ཧཱ། 
16-724
ཞེས་བསྐོར་ཞིང་ཏིལ་དེ་གཉིས་སུ་དོར་རོ། །དེ་ནས་དྲི་ཞིམ་ལྡན་པའི་མར་གྱིས་བྱུག ། འདག་ཆལ་གྱིས་ནི་ཁྲུས་ཀྱང་བྱ། །སྔ་མ་འདག་ཆལ་གྱིས་བཀྲུ། །ཕྱིས་ནས་བུམ་པ་སོ་སོ་ཡིས། །སྐུ་གཟུགས་
རྣམས་ནི་ཁྲུས་ཀྱང་བྱ། །ཕྱི་མ་གཙང་ཁྲུས་བུམ་པ་རྣམས་ཀྱིས་སོ། །སྐུ་ཕྱི་བའི་བར་སྔར་བཞིན་ནོ།། །།
༄། །དངོས་གཞི།
གཉིས་པ་ནི། རང་གཞུང་གི་མདུན་བསྐྱེད་བཞིན་དམ་ཚིག་པ་བསྐྱེད་པ་བྱིན་བརླབས་ཀྱི་བར་སྔོན་
དུ་བཏང་བའི། ཕྱི་ནས་ནམ་མཁར་གནས་པ་ཡི། །དཀྱིལ་འཁོར་འཁོར་ལོ་བཅོམ་ལྡན་འདས། །ལུགས་མ་སོགས་ལ་རབ་གཞུག་བྱ། ཞེས་པས་རང་གཞུང་བཞིན་ཡེ་ཤེས་པ་སྤྱན་དྲངས། ཕྱི་འབྲང་གི་བགེགས་བསྐྲད་ནམ་
མཁར་བཞུགས་པ་ལ་ཐིམ། དེ་ལ་ཆུ་གསུམ་ཉེཪ་མཆོད་ལྔ་སོགས་ཕུལ། བསྟོད་ནས། སྔར་གྱི་ཚུལ་དེས། དག་པའི་རྡོ་རྗེ་བཅོམ་ལྡན་འདས། །རིག་པའི་རྒྱལ་པོ་ཕྱག་འཚལ་བསྟོད། མགོན་པོ་ཐུགས་རྗེ་ཆེ་བདག་
ཉིད། །རྡོ་རྗེ་འཆང་ཆེན་ཆེ་གེ་བདག ། ཇི་ལྟར་ནུས་པའི་ངེས་སྦྱོང་ཀྱིས། །རིག་པའི་རྒྱལ་པོ་འདི་ཞེས་པ། །འགྲོ་ལ་ཕན་ཕྱིར་རབ་གནས་བགྱི། །ཐམས་ཅད་འདིར་ནི་རབ་བཞུགས་ནས། །ཐུགས་རྗེས་ཉེ་བར་
གཟུང་ནས་སུ། །ཐུགས་རྗེ་ཅན་རྣམས་རབ་གནས་མཛོད། །ཛཿཧཱུཾ་བཾ་ཧོཿ རྟེན་གྱི་དམཚིག་པ་དང་གཉིས་མེད་དུ་བསྟིམ། དབང་རྒྱས་བསྡུས། ཡུལ་ཆོས་ལ་སོགས་ཇི་བཞིན་དུ། །ལས་བཅུ་ཡི་ནི་བྱ་བ་བྱ། རྒྱས་པ་སློབ་མ་ལ་བསྐུར་བ་དེ་ཉིད་ཀྱིས་སོ། །
16-725
བསྡུས་པ། དེ་ནས་ཨོཾ་ཨ་ཁཾ་བཱི་ར་ཧཱུཾ་གིས་ཡོན་བདག་གམ་རང་དང་སྐུ་གཟུགས་ཀྱི་མེ་ཏོག་གི་འཕྲེང་བ་བླངས་ཏེ་གཞུང་བཞིན་དུ་མཚོན་བྱེད་ཀྱི་དཀྱིལ་འཁོར་དུ་ཞུགས་པར་བསམ། འདིས་གསང་
བའི་དཀྱིལ་འཁོར་དུ་གཞུག་སྟེ། སློབ་དཔོན་གྱི་ཐུགས་ཀའི་འོད་ཀྱིས་ཕྱོགས་བཅུའི་སངས་རྒྱས་རྣམས་ཀྱི་ཡེ་ཤེས་ཆེན་པོ་བསྐུལ་བས་དེ་དག་འོད་ཟེར་གྱི་རྣམ་པས་རྟེན་བསྐྱེད་པ་ལ་ཐིམ་པར་གྱུར། ཨོཾ་
ཨཱ་བེ་ཤནྟཾ་བྷ་ཡ་ར་ར་ར་ར་ཙ་ལ་ཡ་ཧཱུཾ་ཨ་ཧ་ཛྷཻཾཿ ཞེས་རོལ་མོ་དང་བཅས། དེ་ནས་མེ་ཏོག་པུ་ཙ་ཧོས་དོར། གང་ལ་ཕོག་པའི་ལྷས་པྲ་ཏི་གྲིཧྞ་སྟྲཾ་ཨི་མཱཾ་
སཏྭ་མ་ཧཱ་བ་ལ། དབུར་བཅིངས་རང་གི་སྙིང་ག་ནས་འཕྲོས་པའི་འོད་ཀྱིས། གདན་གསུམ་ཚང་བའི་དབང་གི་ལྷ་ཚོགས་སྤྱན་དྲངས། ཉེར་མཆོད་ལྔ་ཕུལ། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་
པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩལ། །དེ་ལྟར་འདི་ལ་སྩལ་དུ་གསོལ། །གསོལ་བ་བཏབ་པས། དེ་བཞིན་གཤེགས་པ་རྣམས་རང་ཉིད་ཀྱི་ཤེས་རབ་དང་སྙོམས་པར་ཞུགས་པས་སྙིང་གའི་འོད་
ཀྱི་རྟེན་བསྐྱེད་པ་རྣམ་ཞལ་ནས་ཞུགས་ཆགས་པ་ཆེན་པོ་ཞུ་བ། རྡོ་རྗེའི་ལམ་ནས་ལྷ་མོའི་པདྨར་གནས་པ་ལ་སླར་སངས་རྒྱས་རྣམས་རྣམ་སྣང་གི་སྒོ་ནས་ཞུགས་ཞུ་བའི་ཁུ་བས་རྡོ་རྗེའི་ལམ་ནས་པདྨར་གནས་པ་དེ་དག་ལ་དབང་བསྐུར། 
16-726
དེ་ནས་པདྨ་ལས་དཀྱིལ་འཁོར་གྱི་ལྷའི་རྣམ་པ་སྔ་མ་ལྟ་བུར་གྱུར་པ་ཕྱིར་འཐོན་ཏེ་དཀྱིལ་འཁོར་ལ་འཁོད་པར་གྱུར་བ་ལ། ནམ་མཁའ་གང་བའི་དེ་བཞིན་གཤེགས་པ་རིག་མ་དང་བཅས་པ་
རྣམས་ཀྱིས་བདུད་རྩིས་གང་བའི་རིན་པོ་ཆེའི་བུམ་པ་དཀར་པོ་ཕྱག་གིས་བཟུང་། གདུགས་དང་རྒྱལ་མཚན་དང་བ་དན་དང་གར་དང་གླུ་དང་རོལ་མོའི་སྒྲ་དང་མེ་ཏོག་དང་གུར་ཀུཾ་ལ་སོགས་པའི་
ཆར་འབབ་བཞིན་པས་དབང་བསྐུར། གཟུགས་རྡོ་རྗེ་མ་ལ་སོགས་པ་རྣམས་ཀྱིས། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་
ལུས་སྐྱེད་བྱེད་བདེ་བ་ཆེན་པོ་སྟེ། དེ་ནི་དེང་ཁྱོད་དབང་བསྐུར་མཆོག་ལ་གནས་པའི་བཀྲ་ཤིས་ཤོག །ཅེས་པའི་གླུ་ལེན། ཇི་ལྟར་བལྟམས་པ་སྔགས་བཅས་ཀྱི་མཐར། ཨོྃ་བཛྲ་ཨུ་ཀ་ཨ་བྷི་ཥིཉྩ་
ཧཱུཾ། དེ་བཞིན་གཤེགས་པ་ལྔས་བྱིན་གྱིས་བརླབས་པའི་དབུ་རྒྱན་བསྐོན། ཨོཾ་རཏྣ་ཨཾ། ཨོཾ་ཧཱུཾ་ཏྲཱཾ་ཧྲཱིཿཨཿ སྔགས་ཀྱི་དར་དཔྱངས་བཅིངས། སངས་རྒྱས་ཀུན་གྱི་རྡོ་རྗེའི་དབང་སོགས་ཀྱི་སྣང་མཐའ་རྡོ་རྗེ། ཨོཾ་བཛྲ་
ཨ་དྷི་པ་ཏི་སྟྭཾ། ཨ་བྷི་ཥིཉྩ་མི། ཏིཥྛ་བཛྲ་ས་མ་ཡ་སྟཱཾ་ཞེས་པས་དོན་གྲུབ་ཀྱི་དྲིལ་བུའི། ཨོྃ་བཛྲ་སཏྭ་ཏྲཾ་ཨ་བྷིཥིཉྩ་མི་བཛྲ་ནཱ་མ་ཨ་བྷི་ཥེ་ཀ །ལྷ་གང་ཡིན་དེར་མིང་བཏགས། 
16-727
རྟེན་རྡོ་རྗེ་འཆང་རིགས་ཐམས་ཅད་ཀྱི་བདག་པོ་ཡེ་ཤེས་ཀྱི་ཕྱག་རྒྱ་ལ་འཁྱུད་པར་དམིགས། སྔར་བཞིན་ཆུ་དབང་། རིགས་ཀྱི་བདག་པོ་རྡོ་རྗེ་སེམས་དཔས་དབུ་བརྒྱན། དབང་ལྷ་རྣམས་དེ་ལ་ཡེ་ཤེས་
སེམས་དཔའི་ཚུལ་དུ་ཞུགས། ཨོཾ་སུ་པྲ་ཏིཥྛ་བཛྲ་སྭཱ་ཧཱ་བྱིན་གྱིས་བརླབས་བུམ་དབང་ངོ་། །དེ་ནས་འཁོར་ལོའི་དབང་ཕྱུག་ཡབ་ཡུམ་སྙོམས་པར་ཞུགས། སྙིང་ཀའི་ས་བོན་གྱི་འོད་ཟེར་གྱིས་དེ་བཞིན་གཤེགས་
པ་རྣམས་སྤྱན་དྲངས། རྣམ་སྣང་གི་སྒོ་ནས་ཞུགས་པ་བདེ་བ་ཆེན་པོ་ཉམས་སུ་མྱོང་བས་བྱང་ཆུབ་ཀྱི་སེམས་སུ་སྤྲོས་པ་ལྷའི་ཞལ་དུ་སྦྱིན་པ་ཨ་ཧོ་མ་ཧཱ་སུ་ཁ་ཞེས་དགྱེས་པར་
བསམ། དེ་ནས་འཁོར་ལོའི་དབང་ཕྱུག་དེས་ལྷ་མོ་གཏད། དེ་དང་སྙོམས་པར་ཞུགས་པས་ལྷན་ཅིག་སྐྱེས་པའི་དགའ་བ་མངོན་དུ་མཛད། དེས་བག་ཆགས་སྦྱངས་པས་ཁ་སྦྱོར་ཡན་ལག་བདུན་ལྡན་གྱི་རྡོ་རྗེ་
འཆང་དུ་རྫོགས་པར་གྱུར། དབང་གོང་མའོ། ། ལུགས་འདི་ལ་རབ་ཏུ་གནས་པར་དེས་འགྱུར་བ་ཡིན་ཏེ། ཨ་བྷ་ཡས། སློབ་མའི་རབ་ཏུ་གནས་པ་བཞིན་སྐུ་གཟུགས་ལ་སོགས་པའི་རབ་གནས་ཁྱད་པར་མེད་
པར་ཤིང་རྟ་ཆེན་པོ་རྣམས་ཀྱིས་གསུངས་སོ། །ཞེས་འབྱུང་བས་སོ། །མངའ་དབུལ། སྤྱན་ནི་དབྱེ་བར་བྱས་ནས་སུ། །རྡོ་རྗེའི་སྤྱན་ནི་བྱིན་གྱིས་བརླབ། །གསེར་གྱི་ཐུར་མས་དངུལ་གྱི་ཀོང་བུར་བཞག་པའི་མར་སྦྲང་བྱུགས་ནས། 
16-728
ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །དེ་བཞིན་རྒྱལ་བ་རྣམས་ཀྱི་སྤྱན། །སེམས་ཅན་དོན་དུ་དབྱེ་བར་བྱ། །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ནི་སྭཱཧཱ། སྦྱིན་
བདག་ལ་ཐུགས་རྗེའི་གཟིགས་པ་ལྷུར་ལེན་པའི་སྤྱན་དུ་གྱུར་པར་བསམ། དེ་ནས་ཆོས་རྣམས་གཟུཊ་བརྙན་ལྟ་བུ་སོགས་མེ་ལོང་བསྟན། དེ་ནས་སྙན་དབྱེ་བར་བྱ་སྟེ། གསེར་གྱི་རྣ་དྲུ་ཐོགས་ལ། སྒྲ་
རྣམས་ཐོས་པས་འཕོངས་གྱུར་ལ། །རྒྱལ་བས་ཆོས་ཀྱི་རྔ་བརྡུངས་ལྟར། །དེ་བཞིན་སེམས་ཅན་དོན་གྱི་ཕྱིར། །རྒྱལ་བའི་སྙན་ནི་དབྱེ་བར་བགྱི། །ཨོཾ་དེ་བྱཱ་ཀརྞ་ཡེ་སྭཱ་ཧཱ། དེ་ནས་ཤངས་དབྱེ་བའི་གསེར་
གྱི་རྨང་ཚེར་ཐོགས་ཏེ། ཟག་བཅས་ཕུང་པོའི་དྲི་སྤངས་ལ། །རྣམ་པར་དག་པའི་དྲི་བརྙེས་ལྟར། །འགྲོ་བ་སེམས་ཅན་དོན་གྱི་ཕྱིར། །རྒྱལ་བའི་ཤངས་ནི་དབྱེ་བར་བགྱི། །ཨོཾ་དེ་བྱཱ་ན་ཨ་སྱེ་སྭཱ་
ཧཱ། དེ་ནས་ཞལ་དབྱེ་བའི་ཕྱིར་ཐུར་མ་ཐོགས་ཏེ། །ཆོས་ཀྱི་ཆོས་རོ་དགའ་བ་ཡིས། །འགྲོ་བ་ཐམས་ཅད་ཚིམ་མཛད་ལྟར། །རོ་མཆོག་བརྒྱ་ལྡན་ཞལ་ཟས་འདི། །འབུལ་ཕྱིར་ཞལ་ནི་དབྱེ་བར་བགྱི། །ཨོཾ་
དེ་བྱཱ་མུ་ཁ་ཡེ་སྭཱ་ཧཱ། སོ་ཤིང་འབུལ་བ། རིན་ཆེན་མཆོག་གྲུབ་ཀ་ར་ཝཱི་ར་ཡིས། །བཀུར་སྟི་རིམ་གྲོས་ཚིམས་ཀྱི་དྲི་བསལ་ལྟར། །བདེ་གཤེགས་གསུང་གི་དངོས་གྲུབ་ཐོབ་གྱུར་ནས། །འགྲོ་ཀུན་སྐད་དུ་ཆོས་ཀྱི་དོན་སྟོན་ཤོག །
16-729
ཨོཾ་དེ་བྱཱ་དནྟ་ཡེ་སྭཱ་ཧཱ། སྐུ་གཟུགས་ཕྱིའོ། །ལོངས་སྐུ་ཡིན་ན་སྐྲ་ཤད། དབུ་སྐྲ་ལྕང་ལོ་མཐོན་མཐིང་གཡས་འཁྱིལ་བ། །རིན་ཆེན་འབར་བས་བརྒྱན་པ་རབ་ཏུ་མཛེས། །ལྷ་མི་ཀུན་གྱིས་ལྟ་བས་
མི་ངོམས་པའི། །བསོད་ནམས་ཐོབ་ཕྱིར་རྒྱལ་བའི་དབུ་སྐྲ་ཤད། །ཨོཾ་ཀེ་ཤ་བི་ཤྭ་དྷི་ན་ཡེ་སྭཱ་ཧཱ། རྒྱན། བདེ་གཤེགས་སྐུ་ལ་མཚན་དང་དཔེ་བྱད་ལྡན། །བྱང་ཆུབ་མཆོག་གི་རྒྱན་གྱིས་མཛེས་ལགས་
ཀྱང་། །རིན་ཆེན་དོ་ཤལ་སེ་མོ་དོ་ལ་སོགས། །རྒྱན་གྱི་དམ་པ་མཆོག་རྣམས་མཆོད་པར་འབུལ། །ཨོཾ་རཏྣ་ཨ་ལངྐ་ར་ཧཱུཾ། ན་བཟའ། ཇི་ལྟར་སྨན་པའི་རྒྱལ་པོ་འཚོ་བྱེད་ཀྱིས། །རྒྱལ་བའི་སྐུ་ལ་
ན་བཟའ་གསོལ་བ་ལྟར། །འགྲོ་བ་སེམས་ཅན་རྣམས་ལ་ཕན་པའི་ཕྱིར། །ངོ་ཚ་ཁྲེལ་ཡོད་གོས་མཆོག་འབུལ་བར་བགྱི། །ཨོཾ་དེ་བྱཱ་བ་ས་ན་ཡ་སྭཱ་ཧཱ། རབ་བྱུང་ཡིན་ན། ཇི་ལྟར་རང་བྱུང་
མཆོད་རྟེན་དྲུང་། །སྟོན་པས་ཁྱིམ་པའི་རྟགས་སྤངས་བཞིན། །འགྲོ་བ་སེམས་ཅན་དོན་གྱི་ཕྱིར། །དེ་བཞིན་རྒྱལ་བའི་དབུ་སྐྲ་བཞར། །ཨོཾ་སརྦ་ཤྭ་དྷ་ནི་དུཿཁཙྪེ་ཏ་ཧཱུཾ། ན་བཟའ་ཆོས་གོས་གསུམ། དྲི་མེད་མཚན་
ལ་སྒྲིབ་གསལ་མི་མངའ་ཡང་། །དད་པས་དུར་སྨྲིག་རྒྱལ་མཚན་ཕུལ་བ་ཡིས། །ནམ་མཁའི་མཐའ་དང་མཉམ་པའི་འགྲོ་བ་རྣམས། །སངས་རྒྱས་བརྟུལ་ཤུགས་མཆོག་ལ་སྤྱོད་པར་ཤོག །ཨོཾ་བཛྲ་ཝསྟྲ་ཡ་སྭཱཧཱ། མཁོ་བའི་ཡོ་བྱད་གཞན། 
16-730
འགྲོ་བ་སེམས་ཅན་དག་ལ་ཕན་པའི་ཕྱིར། །རིག་པའི་གནས་ལྔ་དག་ལ་བསླབ་བྱ་ཞེས། །ཇི་ལྟར་ཐུགས་དམ་རྒྱ་ཆེར་བཞེས་པ་བཞིན། །མཁོ་བའི་ཡོ་བྱད་རྣམས་ནི་འབུལ་བར་བགྱི། །ༀ་སུ་ཁ་པ་
རི་ཀ་རི་ཡེ་སྭཱཧཱ། ཨོཾ་ཁཾ་སུ་ཁ་པ་རི་ཀ་རི་ཡེ་སྭཱ་ཧཱ། གཉིས་ཀ་ལ་ཐུགས་ཀར་རྡོ་རྗེ་བཟུང་། །མཚན་དང་དཔེ་བྱད་ལ་སོགས་བསྐྱེད་པའི་ཕྱིར། །དུང་དང་དཔལ་བེའུ་གཡུ་དྲུང་འཁྱིལ་
བ་དང་། །བཀྲ་ཤིས་རྫས་བརྒྱད་དག་གིས་རྣམ་བརྒྱན་པ། །རྒྱལ་བའི་ཐུགས་ལ་རྣམ་པར་བརྒྱན་པར་ཤོག །ཨོཾ་སྭ་སྟི་ཤཱི་མ་ཧཱ་པུ་རུ་ཥ་ཤ་ན་ཤྲཱི་ཨ་ནུཏྟ་ར་བི་ཛ་ན་ཡེ་སྭཱ་
ཧཱ། དེ་ནི་སྐུ་གཟུགས་ཀྱིའོ། ། རིན་ཆེན་དུ་མ་ལས་གྲུབ་སེངྒེའི་ཁྲི། །ཡིད་འཕྲོག་སྣ་ཚོགས་གོས་ཀྱིས་བཀབ་པ་འདི། །སྤྲོས་བྲལ་གསུང་རབ་མཆོག་ལ་ཕུལ་བ་ཡིས། །འགྲོ་ཀུན་རྡོ་རྗེའི་གདན་ལ་བཞུགས་པར་
ཤོག །ཨོཾ་བཛྲ་ས་ན་ཨཱཿཧཱུཾ། གོས། སྣ་ཚོགས་དབང་པོའི་གཞུ་བཞིན་རབ་བཀྲ་བ། །གང་ལ་རེག་ན་བདེ་བའི་རྒྱུར་འགྱུར་བའི། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་
བརྒྱན་པར་ཤོག །ཨོཾ་བཛྲ་ཝསྟྲ་ཡེ་སྭཱ་ཧཱ། གླེགས་ཤིང་། ཟུང་འཇུག་དམ་ཆོས་འཛིན་པ་ཀུན་བྲལ་ལ། །ཐབས་དང་ཤེས་རབ་རྗེས་སུ་འབྲེལ་འགྱུར་པའི། །ཉི་ཟླ་ལྟ་བུའི་རྟེན་འབྲེལ་དགའ་བྱ་བ། །ཕུལ་བས་སྐྱེ་བོས་ཟུང་འཇུག་ཐོབ་པར་ཤོག །
16-731
ཨོཾ་བཛྲ་པྲཛྙཱ་ཨུ་པ་ས་ཡ་ཨ་བྷ་ཡ་ཨཱཿཧཱུཾ། གླེགས་ཐག །སྤྲོས་པ་དུ་མས་རབ་ཏུ་བརྒྱན་གྱུར་ཀྱང་། །ཡེ་ཤེས་ཆེན་པོར་རོ་གཅིག་གྱུར་པ་ལྟར། །གླེགས་བམ་གཅིག་གྱུར་ཡོ་བྱད་མཆོག་ཕུལ་བས། །
འགྲོ་བས་ཡེ་ཤེས་ཆེན་པོ་ཐོབ་པར་ཤོག །ཨོཾ་བཛྲ་པུསྟཀ་བནྡྷ་ཨཱཿཧཱུཾ། གསུང་རབ་ཀྱིའོ། །སྲོག་ཤིང་། ཨོཾ་བཛྲ་ཨཱ་ཡུ་ཥེ་སྭཱ་ཧཱ། སེམས་ཅན་ཐམས་ཅད་ཤེས་པ་བཅུ་དང་ལྡན་པར་གྱུར་ཅིག །བདེ་བར་
གཤེགས་པའི་བསྟན་པ་དམ་བའི་ཆོས་མི་ནུབ་ཅིང་ཡུན་རིང་དུ་གནས་པར་གྱུར་ཅིག །སེམས་ཅན་ཐམས་ཅད་ལྷག་པའི་བསམ་པ་རྣམ་པར་དག་པ་ཀུན་ཏུ་བཟང་པོའི་སྨོན་ལམ་ལ་འཇུག་པར་གྱུར་ཅིག །
འཁོར་ལོ། ཨོཾ་པྲ་ཝརྟ་ནཱ་ཡ་སྭཱ་ཧཱ། སེམས་ཅན་ཐམས་ཅད་དེ་བཞིན་གཤེགས་པའི་སྟོབས་བཅུ་དང་། །མ་འདྲེས་པའི་དྲན་པ་ཉེ་བར་གཞག་པ་གསུམ་ཐོབ་པར་གྱུར་ཅིག །རྣམ་པར་ཐར་པ་བརྒྱད་ཐོབ་
པར་གྱུར། །ཡེ་ཤེས་ལྔ་དང་ལྡན་པར་གྱུར་ཅིག །ཅོད་པན། ཨོཾ་པ་ཊི་ཀ་བི་བྷ་ཡ་སྭཱཧཱ། སེམས་ཅན་ཐམས་ཅད་དུས་ཐམས་ཅད་དུ་དར་གྱི་ཅོད་པན་དང་ལྷབ་ལྷུབ་ལ་སོགས་པས་མཆོད་པ་
དང་བསྙེན་བཀུར་གྱི་རྣམ་པ་མང་པོས་དེ་བཞིན་གཤེགས་པ་འཁོར་དང་བཅས་པ་ཐམས་ཅད་དང་དེ་དག་གི་མཆོད་རྟེན་དང་། སྐུ་གཟུགས་དང་གསུང་རབ་ལ་སོགས་པ་དེ་དག་ལ་མཆོད་པ་བྱེད་པར་གྱུར་ཅིག །
16-732
འཕན། ཨོཾ་པ་ཏྲཾ་ཀི་སྭཱ་ཧཱ། སེམསཅན་ཐམས་ཅད་ཆོས་ཀྱི་གྲགས་པ་དང་སྙན་པ་བསམ་གྱིས་མི་ཁྱབ་པར་གྱུར་ཅིག །ཆུ་སྲིན་གྱི་རྒྱལ་མཚན། ཨོཾ་ཀུ་བྷེ་ར་དྷཱ་ཛ་ཡ་སྭཱ་ཧཱ། སེམས་ཅན་
ཐམས་ཅད་འཁོར་བར་མི་གཏོང་ཞིང་མི་འབྱིང་བས་བདུད་བཞི་ལས་རྒྱལ་བའི་ཆོས་མི་ནུབ་པའི་རྒྱལ་མཚན་དུ་གྱུར་ཅིག །ཨོཾ་བྷྲ་མ་ཎ་ཡེ་སྭཱ་ཧཱ། སེམས་ཅན་ཐམས་ཅད་བླ་ན་མེད་པའི་སྐྱབས་
དང་ལྡན་ཞིང་ཆོས་ཀྱི་རྒྱལ་པོར་གྱུར་ཅིག །འཕྲེང་བ་ཕུལ། ཨོཾ་རཏྣ་མ་ལེ་ཏྲཾ། ན་མ་སྟྲཻ་ཡ་དྷི་ཀ་ཨ་ནུ་ག་ཏ་པྲ་ཏིཥྛ་ཏེ། པུཥྤ་ཀེ་ཏ་བེ་ཏ་ཐཱ་ག་ཏེ་སཾམྱག་སམྦུ་
དྡྷཱ་ཡ། ཏདྱཐཱ། ཨོཾ་བཛྲ་པུཥྤེ་ཨཱཿཧཱུཾ། སེམས་ཅན་ཐམས་ཅད་མཚན་དང་དཔེ་བྱད་དང་ལྡན་ཏེ་སྐུ་བལྟ་བས་ཆོག་མི་ཤེས་པ་ཐོབ་པར་གྱུར་ཅིག །ཨོཾ་བཛྲ་པུ་ན་དྷ་ནི་ཛ་ཡེ་སྭཱཧཱ། སེམས་ཅན་
ཐམས་ཅད་ཀྱིས་གདན་གྱི་ཁྱད་པར་སྟོབས་བཅུ་དང་ལྡན་པ་གླང་པོ་ཆེའི་གདན་དང་། མི་འཇིགས་པ་བཞི་དང་ལྡན་པ་སེང་གེའི་གདན་དང་། རྫུ་འཕྲུལ་གྱི་རྐང་པ་བཞི་དང་ལྡན་པ་རྟའི་གདན་དང་།
དབང་བཅུ་དང་ལྡན་པ་རྨ་བྱའི་གདན་དང་། ཐམས་ཅད་དུ་ཐོགས་པ་མེད་པའི་སྟོབས་ཀྱི་ཤུགས་དང་ལྡན་པ་ནམ་མཁའ་ལྡིང་གི་གདན་དང་། འགྲོ་བའི་དགོས་འདོད་ཡིད་བཞིན་དུ་སྐོང་བའི་རིན་པོ་ཆེའི་གདན་དང་། 
16-733
ཆགས་པའི་སྐྱོན་ཐམས་ཅད་སྤངས་བ་པདྨའི་གདན་དང་། རང་བཞིན་གྱིས་འོད་གསལ་བ་ཉི་ཟླའི་གདན་ཐོབ་བར་གྱུར་ཅིག །མཆོད་རྟེན་གྱིའོ། ། ཐུན་མོང་གི་མངའ་དབུལ་མཎྜལ། རི་རབ་གླིང་བཞི་གླིང་ཕྲན་ཉི་ཟླ་
ལྕགས་རིར་བཅས། རིན་ཆེན་སྣ་འདུན་གཏེར་གྱི་བུམ་པས་ལེགས་བཀང་སྟེ། བདག་ལུས་ལོངས་སྤྱོད་སྣང་སྲིད་བཅས་པ་ཡོངས་འབུལ་ན། ཐུགས་རྗེ་ཆེན་པོས་དགོངས་ཏེ་བཞེས་ནས་བསྐྱབ་ཏུ་གསོལ། གུ་རུ་ཨེ་དཾ་
མཎྜལ་ཀཾ་ནིརྻ་ཏ་ཡཱ་མི། གདུགས་སོགས། ཐེག་མཆོག་བླ་བྲེ་གདུགས་དང་བ་དན་དང་། །བདུད་བཅོམ་རྒྱལ་མཚན་ལྷབ་ལྷུབ་དར་འཕན་དང་། །གར་དང་རོལ་མོའི་མཆོད་པ་སྒྲ་དབྱངས་ཀྱིས། །རྒྱལ་བའི་དཀྱིལ་འཁོར་མ་
ལུས་མཛེས་པར་བགྱི། །རིན་ཆེན་བདུན། ཇི་ལྟར་མི་དབང་འཁོར་ལོ་བསྒྱུར་བ་ནི། །རིན་ཆེན་སྣ་བདུན་ཚོགས་དང་ལྡན་པ་ལྟར། རྒྱལ་བ་རྣམས་དང་བྱང་ཆུབ་སེམས་དཔའ་ལ། །རིན་ཆེན་སྣ་བདུན་ཚོགས་བཅས་
འབུལ་བར་བགྱི། །བཀྲ་ཤིས་རྫས་བརྒྱད། ལྷ་ཡི་དབང་པོ་ལྷ་མིན་གཡུལ་རྒྱལ་ནས། བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བ་རྣམས་དང་བྱང་ཆུབ་སེམས་དཔའ་ལ། །བཀྲ་ཤིས་རྫས་བརྒྱད་དག་གིས་
མཆོད་བར་བགྱི། །འདོད་ཡོན་ལྔ། གཟུགས་སྒྲ་དྲི་རོ་རེག་ལྡན་པའི། །མཆོག་ཏུ་གྱུར་པའི་ལོངས་སྤྱོད་རྣམས། །བདག་གི་དད་པས་འབུལ་བར་བགྱི། །ཅི་བདེ་བར་ནི་བཞེས་སུ་གསོལ། །ཨོཾ་བཛྲ་དེ་ཝི་ཨཱནྣ་ས་མཱ་དྷི་སྭཱ་ཧཱ། 
16-734
བིལ་བ་སོགས། འཇིག་རྟེན་ཁྱིམ་བདག་རྣཾས་ནི་དཔལ་བརྟེན་ནས། །བིལ་བ་སྟར་དགའ་བུམ་པ་བཟང་པོར་བཅས། །མདུན་དུ་བདར་ནས་བཀྲ་ཤིས་བྱེད་པ་ལྟར། །རྒྱལ་བ་སྲས་དང་བཅས་ལ་འབུལ་བར་བགྱི། །མཆོད་
བསྟོད་ཀྱི་མངའ་དབུལ། དེ་བཞིན་མེ་ཏོག་སྤོས་མར་མེ། །བྱུག་པ་ཞལ་ཟས་ཞེས་པ་ཉེར་མཆོད། །དེ་བཞིན་ཏེ་ཕྱི་ནང་གསང་བ་དེ་ཁོ་ན་ལ་ཆོ་ག་སོ་སོའི་རྗེས་མཐུན། དེ་ལྟར་ལས་ནི་
ཀུན་བྱས་ཤིང་། །སྦྱིན་སྲེག་ལས་ཀྱིས་རྫོགས་པར་བྱ། །ལྷ་ཀུན་ཞལ་ནི་མེ་ཡིན་ལ། །རྒྱས་པའི་སྦྱིན་སྲེག །ཐབ་ཁུང་གི་མེ་ལ་འོ་མ་ཧཱགས་མར་སྦྲང་རྩི་ཀ་ར་བཏབ་པ། རང་གི་བདག་པོའི་
སྔགས། ཨོཾ་ཤྲཱི་ཧེ་རུ་ཀ་ཡ་པདྨ་ཧེ་བིདྱཱ་རཱ་ཛ་ཡ་ཧཱུཾ་ཕཊཿཀྱིས་སྐོལ། ཨོཾ་དེ་བྱཱ་ཨགྣ་ཡེ་དྷྱ་ན་པྲ་ཎི་ནེ་སྭཱ་ཧཱ། ལྷ་རྣམས་ཀྱི་གསོལ་བར་བསམ། ༀ་ཧཱུཾ་ཧྲཱཾ་ཧྲཱིཿཨཿ ཞེས་པས་
དམ་ཚིག་སྦྲག །དེ་ནས་གཞན་དུ་ཙཱ་རུའི་བཟའ་བའམ། བླ་མེད་ལ་གཞུང་བཞིན་ཚོགས་ཀྱི་འཁོར་ལོས་མཆོད། །གཙུག་ལག་ཁང་རྫོགས་པའི་སངས་རྒྱས་དང་། །དེ་བཞིན་ཆོས་དང་དགེ་འདུན་གྱི་གནས་སུ་བསྒྱུར། །སྐུ་
གཟུགས་གང་གནས་བྱ། དེ་ཁར་དང་། གསུང་རབ་ཡི་གེའི་རྣམ་པར། མཆོད་རྟེན་གང་ཡིན་པར་བླ་མ་རྗེ་བཙུན་པ་དང་། དཀོན་མཆོག་རིན་ཆེན་ཐམས་ཅད་དང་། །ཡི་དམ་མཁའ་འགྲོ་ཆོས་སྐྱོང་བའི་བསྲུང་མ་ཐམས་ཅད་ཀྱི་བཀའ་བདེན་པ་དང་བདེན་པ་ཆེན་པོའི་བྱིན་གྱིས་བརླབས་ཀྱིས། །
16-735
བདག་ཆེ་གེ་མོ་ཞེས་བྱ་བས་རབ་ཏུ་གནས་པ་བྱས་པའི་རྟེན་འདི་རྣམས་འགྲོ་བ་སེམས་ཅན་ཐམས་ཅད་ཀྱི་ཕྱག་གི་གནས། མཆོད་པའི་རྟེན་དུ་གྱུར་ནས་སྤྲུལ་པ་སྐུའི་མཛད་པ་མངོན་སུམ་དུ་
མཛད་པར་གྱུར་ཅིག །གསུམ་ཀ་སྐུ་གསུང་ཐུགས་འགྲོ་བའི་དོན་ལ་འཁོར་བ་ཇི་སྲིད་དུ་གནས་པར་སངས་རྒྱས་ཐམས་ཅད་ཀྱིས་བྱིན་གྱིས་བརླབ་པར་བསམ། དེ་ནས། མཁས་པས་རབ་ཏུ་གནས་པར་བྱ། །ཞེས་
པ། དཔོན་སློབ་གཉིས་ཀས་རྟེན་གྱི་གདན་ཁྲི་ནས་བཟུང་། མེ་ཏོག་གི་འཕྲེང་བ་ཕུལ་ཏེ། ཇི་སྲིད་མེ་དང་ཆུ་དང་ནི། །རླུང་གིས་བསྐལ་པ་འཇིག་བར་དུ། །སྦྱིན་བདག་བསོད་ནམས་སྤེལ་བ་དང་། །སེམས་
ཅན་ཀུན་གྱི་དོན་གྱི་ཕྱིར། །ཇི་ལྟར་རྫོགས་པའི་སངས་རྒྱས་རྣམས། །དགའ་ལྡན་གནས་སུ་རབ་བཞུགས་ནས། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་ལྟར་འདིར་ནི་བཞུགས་སུ་གསོལ། །ཆེ་གེ་ཞེས་བྱའི་དོན་དུ་
ནི། །བྱང་ཆུབ་སེམས་ནི་ཡོངས་འཕེལ་ཕྱིར། །མེ་ཏོག་ལ་སོགས་འདི་བཞེས་ཏེ། །མགོན་པོ་འདིར་ནི་རྟག་བཞུགས་མཛོད། །འཁྱིལ་བའི་སྔགས་བཟླས་ཤིང་སྐུ་གཟུགས་ལ་སོགས་པའི་འོག་བར་སྟེང་གི་ཆར་རྡོ་རྗེ་གསོར།
ལན་གསུམ་བསྐོར།། །།
༄། །རྗེས་ཀྱི་བྱ་བ།
གསུམ་པ་རྗེས་ནི། རབ་གནས་ཡད་དག་རྫོགས་དུས་ན། །བསྟོད་དང་བཀྲ་ཤིས་བརྗོད་བྱ་ཞིང་། ཞེས། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། །
16-736
རྡོ་རྗེ་དབྱིངས་ཁྱོད་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་བ་སྟེ། །རང་བཞིན་འོད་གསལ་མཆོག་གི་མཆོག །སྟོན་མཛད་རྡོ་རྗེ་ཁྱོད་ཕྱག་འཚལ། །རིན་ཆེན་རྒྱལ་པོ་ཤིན་
ཏུ་ཟབ། །རྡོ་རྗེ་ནམཁའ་དྲི་མ་མེད། །རང་བཞིན་དག་པ་གོས་པ་མེད། །རྡོ་རྗེ་སྐུ་ཁྱོད་ཕྱག་འཚལ་ལོ། །རྡོ་རྗེ་བདུད་རྩི་རྒྱལ་པོ་ཆེ། །མི་རྟོག་ནམ་མཁའི་རྡོ་རྗེ་འཛིན། །ས་དང་ཕ་རོལ་
ཕྱིན་པ་བརྙེས། །རྡོ་རྗེའི་གསུང་ཁྱོད་ཕྱག་འཚལ་ལོ། །དོན་ཡོད་རྡོ་རྗོ་རྫོགས་སངས་རྒྱས། །བསམ་བ་ཐམས་ཅད་ཡོངས་རྫོགས་ཅན། །དག་པའི་ངོ་བོ་ཉིད་ལས་བྱུང་། །རྡོ་རྗེ་སེམས་དཔའ་ཁྱོད་ཕྱག་འཚལ། །ཡེ་དྷརྨཱ་
ལེགས་པར་བསྔགས་པའི་འབྲུ་འཐོར་ཞིང་། །བཀྲ་ཤིས་ཀྱི་ཚིགས་སུ་བཅད་པ་རྣམས་བརྗོད། མྲྀ་ཏངྒ་སོགས་སིལ་སྙན་སྒྲ། །ཇི་ལྟར་རྙེད་པས་རབ་ཏུ་མཆོད། །ཞག་བདུན་དུ་མཆོད་པ་ཐམས་ཅད་ཀྱིས་མཆོད། །སྟོན་མོ་
དང་ནི་ཡོན་ཕུལ་བས། །སྐྱེ་བོ་ཚིམ་ཞིང་རྒྱས་པར་བྱ། །རབ་སྟོན། རྒྱས་པས་སྐྱེ་བོ་སྐལ་པ་བཟང་། །བཀྲ་ཤིས་ཞེས་དང་། མི་མཐུན་པ། ཞི་བར་བཅས་གྱུར་ཏེ། ཞི་བའི་སྦྱོར་བ་ལ་སྨོད་པ།
སྡུག་བསྔལ་སྣ་ཚོགས་འཚེ་བར་འགྱུར། །དེར་ཕྱོགས་སྐྱོང་ངཾ་། མ་ཧཱ་ཀཱ་ལ། ཡུལ་གྱི་བདག་པོ་ལ་གཏོར་མ་སྦྱིན། འགྲོ་བ་སེམས་ཅན་དོན་སླད་དུ། ། བདེ་གཤེགས་རྣམས་ནི་བཞུགས་གྱུར་གྱི། །བདག་དང་གཞན་གྱི་དོན་གྱི་ཕྱིར། །
16-737
སྤྲུལ་པའི་གཟུགས་བརྙན་བསྲུང་བར་མཛོད། །བཅོམ་ལྡན་འདས་ཕྱག་ན་རྡོ་རྗེ་ལ་མཆོད་པ་ཕུལ་ནས། བདེ་བར་གཤེགས་པའི་སྤྲུལ་པའི་སྐུ་བསྲུང་བར་ཞལ་གྱིས་བཞེས་པས་ཇི་སྲིད་བཅོམ་ལྡན་འདས་བཞུགས་ཀྱི་བར་
དུ་བསྲུང་བར་མཛད་དུ་གསོལ། །དེ་ནས་ཡོན་བདག་ལ་བསྒོ་སྟེ། དེ་ལས་ཐམས་ཅད་པས་བསངས། །ཡི་དམ་དུ་བསྒོམ་དུ་བཅུག །མེ་ཏོག་གི་འཕྲེང་བ་ལག་ཏུ་གཏད། །སློབ་དཔོན་གྱིས་བཀྲ་ཤིས་ཀྱི་རྫས་
རྣམས་སྣོད་གཙང་མར་བཤམས་བགེགས་བསྐྲད། བསངས་སྦྱངས་། གྲུབ་པའི་རྫས་སུ་བྱིན་གྱིས་བརླབས། མེ་ལོང་ཡེ་ཤེས་རྒྱ་མཚོ་ཆེན་པོ་ཡིས། །ཡེ་ཤེས་རྒྱ་མཚོ་མཆོག་ཏུ་དག་གྱུར་ཏེ། །རྣམ་དག་ཆོས་ལ་ཐོགས་མེད་
ལོངས་སྤྱོད་པའི། །བཀྲ་ཤིས་དེས་ཀྱང་སྒྲིབ་པ་དག་གྱུར་ཅིག །དང་པོར་རབ་ཏུ་གནས་པར་བྱས་པའི་ལྷ་ལ་ཕུལ། །ཕྱིས་ཡོན་བདག་ལ་གཏད་པས་དེ་དག་གི་བཀྲ་ཤིས་ཐམས་ཅད་འཕེལ་བར་བསམ། གིའུ་
ཝཾ་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོགས་གྱུར་ནས། །ཉོན་མོངས་ཟུག་རྔུ་མེད་པར་གྱུར་པ་ཡི། །བཀྲ་ཤིས་དེས་ཀྱང་སྡུག་བསྔལ་དག་གྱུར་ཅིག །སྔར་བཞིན། ཞོ་ནི་ཀུན་
གྱི་སྙང་པོར་གྱུར་པ་སྟེ། །སྙིང་པོ་རྣམ་དག་ཡེ་ཤེས་མཆོག་རྟོགས་ནས། །ཡོན་ཏན་ཀུན་གྱི་དབྱིངས་སུ་གྱུར་པ་ཡི། །བཀྲ་ཤིས་དེ་ཀྱང་དུག་གསུམ་ཞི་གྱུར་ཅིག །དཱུརྦས་ཚེ་ནི་འཕེལ་བར་བྱེད་པ་སྟེ། །
16-738
རྡོ་རྗེ་སེམས་པའི་ཚེ་ནི་རབ་བསྒྲུབས་ནས།།ཉོན་མོངས་སྐྱེ་ཤི་རྒྱུན་ཆད་གྱུར་པ་ཡི། །བཀྲ་ཤིས་དེས་ནི་ཚེ་ཡང་འཕེལ་བར་ཤོག །བིལ་བ་རྒྱུ་རྐྱེན་འབྲས་བུར་བཅས་པའི་ཆོས། །འཇིག་རྟེན་འཇིག་རྟེན་
འདས་པའི་སྤྱོད་པ་བདུན། །བྱང་ཆུབ་སྙིང་པོ་མཆོག་ཏུ་དག་གྱུར་ཏེ། །བཀྲ་ཤིས་དེས་ཀྱང་དོན་ཀུན་གྲུབ་པར་ཤོག །དུང་ནི་ཆོས་ཀྱི་སྒྲ་རྣམས་སྒྲོག་པའི་ཚུལ། །ཡེ་ཤེས་རྒྱ་མཚོ་ཉིད་དུ་དག་གྱུར་
ཏེ། །ཆོས་རྣམས་མ་ནོར་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིག་ལ་དབང་ཐོབ་ཤོག །ལི་ཁྲི་དམར་པོ་དབང་གི་རང་བཞིན་ཏེ། །ཆོས་རྣམས་ཐམས་ཅད་དབང་དུ་བསྡུས་ནས་ཀྱང་། །ཆོས་ཀྱི་རྒྱལ་
སྲིད་རབ་ཏུ་བརྟན་པ་ཡི། །བཀྲ་ཤིས་དེས་ཀྱང་ཁྱེད་སྲིད་བརྟན་གྱུར་ཅིག།།ཡུངས་ཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་འཇོམས་པར་བྱེད་པ་ཡིས། །མཐུ་སྟོབས་ཡོན་ཏན་ཕུན་སུམ་ཚོགས་
གྱུར་སྟེ། །བཀྲ་ཤིས་དེས་ཀྱང་བགེགས་རྣམས་ཞི་བར་ཤོག །རྟེན་འདི་རབ་ཏུ་གནས་པ་ལེགས་པར་གྲུབ་པ་ཡིན་པས་དེང་ཕྱིན་ཆད་ལེགས་པར་མཆོད་ཅིག་ཅེས་བསྒོའོ། །དེ་ནས་ཚོགས་སམ་སྟོན་མོ་ལ་ལོངས་
སྤྱོད། ལྷག་ཆད་ཡོད་སྲིད་པས་བཟོད་པར་གསོལ།།ཡིག་བརྒྱ་འདོན། དགེ་རྩ་བསྔོ། ཕན་ཡོན་ཇི་ལྟར་རབ་ཏུ་མི་གནས་ལྷ། །རབ་ཏུ་གནས་པར་བྱ་བར་ནུས། །སློབ་མ་དང་བཅས་གསོལ་འདེབས་པས། །བསོད་ནམས་ཕྱིར་ནི་བྱ་བ་སྟེ། །
16-739
རྣམ་རྟོག་མེད་པའི་རང་བཞིན་གྱིས། །རབ་གནས་ལྷ་ནི་བཞུགས་པ་ཡིན། །དང་། འཇིག་རྟེན་སྐྱེ་བོའི་ལྷ་ལ་སོགས། །གང་ཚེ་རྟག་ཏུ་གནས་གྱུར་པས། །མཆོད་དང་མཆོད་བྱ་མཉམ་ལྡན་པ། །དེ་ཚེ་ལྷ་ཡང་
ཡང་དག་བཞུགས། །འདི་ཡང་དཀར་རྒྱུད་ཆོས་སྡིངས་སུ་གནས་མཆོད་ལ་སོགས་དོན་གཉེར་གྱི་ངོར་པདྨ་དཀར་པོས་སྦྱར་བའོ། །ཨེ་མ་ཚིག་བོངས་ཀྱིས་གཞོན་ནུ། །མཐུ་ཡི་ཚོགས་ནང་ཆེ་བ་འདི། ། རབ་གནས་རྨ་
བྱའི་ཟློས་གར་ལ། །ཞོན་པའི་མདུན་ལས་བཀྲ་ཤིས་ཅི།། །།མངྒ་ལཾ།། །།


